dringa gibt’s do

do gehts da scho wieda so guad, dassd nur mehr woarts drauf, dass di niedaprackt. und im moment, do gehts ma schau extrem guad… oba i hoff, dass de guade streckn nu bis saumstog hoit, dann is ma des eigentlich eh schau wieda egal. nur bis saumstog, dass i am freitog nu mein urlaub buchn kau. dann derfs wieda für fünf wochn deppad her geh und dann kimmt da urlaub und es sollat ois wieda passn. ^^

hach jo, sche waun ma sei lebn so im griff hätt und des so kontrolliern kinnad. i woaß im moment ned vü, außa dass i a) mei portfolio fertig mochn muas und b) ois genießn muas, wos kimmt, sonst warad des jo gaunz dumm vo mir.

und dummheit is a schlechte idee, vor oim wauns wetter so sche is und ma unbedingt nu wos mochn kinnad heit aufd nocht. vll hot jo mei zuckaschneckal zeit. *fg* oda sunst hoit mei liaba, brava mau. ana vo de zwa herrn wird si jo schau daboarma, dass a wos mit mir moch. ^^

maunchmoi sollat ma wirklich neiche ideen fördern… oiso mechad i oafoch amoi sogn… da blo is des neiche ultimativ wort für „das blog“, wobei i ma imma nu ned sicha bin, ob des ned „der blog“ hoaßt auf hochdeitsch. genauso: „das kebap“ oda „der kebap“. a frog, de mi eh schau längere zeit üba beschäftigt. jo… „der“ oda „das“ san hoit schau ziemliche blede artikeln und des is a da grund, warum die meistn leidln, de deitsch lernan scheitan. de vamaledeitn artikl.

mittlaweile bin i a zu dem entschluss kema, dass ma auf jedn foi sogn kau: he, de mundort is wos schens. ma muas de fördern, oiso werd i do schau öfta moi herschaun und an koidn kaffee mit nix dahinta (da koch wohnt wo aundas! nämli do: http://palatschinknundblunzn.wordpress.com/ )

und weils da kellna und da koch, ohne an hoaglichn gost nix waradn und de gaunze institution ned stimmad, gibts den ursprungsgrund, den gost do zum findn: hoaglzipf.wordpress.com

da gost hot de gaudi nämli augfaungt und vo dem her… da gruppnzwaung.

oba zruck zum ursprungsthema… da blo is hoid schau wos bsundas… da blo, der hots voi drauf und der erzöht a gschichtn. durch den kau ma gschichtn erzöhn. an komplett wache und fremde leid. oda a an leid, de die kennan. da blo is wos bsundas. auf jedn foi. und a munort blo… wötklasse! echt!

soda, nochdem mi grod da gruppnzwaung erreicht hot… seas leidl, des is da gruppnzwaung mundoart blo, koida kaffee, do muas i jetzt schreibn, wei i zwunga wordn bin und a wauns nervt, vielleicht is eh guad, waun ma sowos mocht.

jetz is wos do. guade nocht ihr menschn!